O Concello de Boiro colabora con Peñas Boiro AC no desenvolvemento da II Andaina Solidaria Peñeira que está prevista para o domingo 31 de maio en beneficio da asociación BarbanTEA, entidade do Barbanza centrada en impulsar a inclusión e o benestar das persoas con autismo e trastornos TEA. A concelleira de Cultura, María Outeiral, participou este luns 18 de maio na presentación xunto con David Laíño, presidente de Peñas Boiro AC; e Patricia Davila, presidenta de BarbanTEA.
Segundo indicaron, a andaina terá saída ás 10.00 horas da praza de Galicia e contará con dous percorridos distintos, un longo de 10 quilómetros e un máis curto de 5,5 quilómetros pensado para persoas que acoden con nenos pequenos ou carriños.
“A inscrición ten un custe de 7 euros que serán doados integramente á asociación BarbanTEA gracias a todos os colaboradores que financian a andaina”, afirmou David Laíño.
Patricia Davila, presidenta de BarbanTEA, agradeceu a Peñas Boiro “por contar coa asociación como beneficiaria desta andaina, non só pola importancia da doazón, senón tamén porque nos axuda a darlle visibilidade aos trastornos do espectro autista e á asociación”.
A concelleira de Cultura, María Outeiral, animou á veciñanza a participar nesta “actividade que mestura deporte, cultura e solidariedade e que ten un fin moi importante, recadar fondos que van redundar en melloras para os rapaces e rapazas con TEA ou TDAH”.
Nos dous percorridos haberá puntos de avituallamento e ao remate, haberá animación musical na rúa peonil. As inscricións para participar están abertas e poden facerse en liña ou de xeito presencial na mesa que Peñas Boiro AC instalará na rúa peonil os días 20, 21, 27 e 28 de maio. Ademais haberá fila 0 para todas aquelas persoas que non poidan asistir pero queiran facer a súa doazón.
