A coordinadora de UCIN Galicia, encabezada por José Luis Calo, emitiu un comunicado este luns 27 de abril relacionado coa Atención Primaria en Galicia. Sinalan que esta atópase nunha situación “crítica e insostíbel” , e máis tras coñecerse os datos do informe do Consello de Contas de Galicia, que constata, apuntan, “un deterioro estrutural do sistema sanitario”. Desde UCIN Galicia responsabilizan ao presidente da Xunta, Alfonso Rueda, e ao Partido Popular de Galicia de “levar a sanidade pública galega a unha situación límite”. E engaden: “Non estamos ante un problema puntual nin conxuntural. Estamos ante un abandono planificado da Atención Primaria por parte do Goberno galego, que leva anos recortando recursos e mirando cara outro lado mentres a situación empeora”.
UCIN Galicia di que o informe do Consello de Contas achega “cifras demoledoras” e nel, explican, “dise que Galicia destina arredor dun 12% do gasto sanitario á Atención Primaria, moi lonxe do 25% recomendado por organismos internacionais, e preto dun 28% das prazas están vacantes, o que evidencia a falta estrutural de profesionais”. Ademais, denuncian que “existen arredor de 120 concellos sen pediatra propio”, e que “os tempos de espera para conseguir cita superan en moitos casos as 48 horas, incumprindo os estándares recomendados”.
A formación lembra tamén que “o envellecemento da poboación agrava a situación, cun incremento significativo das persoas maiores e dos pacientes crónicos, o que eleva a presión asistencial sen que se produza un reforzo proporcional do sistema. Mentres a realidade é que faltan médicos e pediatras, o Goberno galego segue vendendo unha sanidade ficticia que non existe para miles de galegos e galegas”.
