Un veciño de Ribeira enfróntase a unha petición de cinco anos de prisión por un presunto delito de tráfico de drogas, nun caso no que ademais se aprecia reincidencia.
O xuízo está sinalado para este 15 de abril na Audiencia Provincial da Coruña, onde a Fiscalía solicitará tamén unha multa de 1.600 euros, así como a inhabilitación especial para o exercicio do dereito de sufraxio pasivo durante o tempo da condena.
Segundo o escrito de acusación, o procesado xa fora condenado previamente por un delito similar, polo que concorre a agravante de reincidencia. Os feitos polos que agora será xulgado remóntanse a maio do pasado ano, cando supostamente foi sorprendido en posesión de diversas substancias estupefacientes destinadas á súa distribución.
En concreto, os axentes incautáronlle cocaína de alta pureza, heroína e outras substancias preparadas para a súa venda en pequenas doses, así como diñeiro en efectivo procedente, presuntamente, da actividade delituosa.
O Ministerio Fiscal considera que os feitos constitúen un delito contra a saúde pública na modalidade de tráfico de drogas que causan grave dano, polo que solicita a correspondente condena de prisión.
