O delegado do Goberno en Galicia, Pedro Blanco, reuniuse este martes 7 de abril co presidente da Federación Galega de Municipios e Provincias (FEGAMP), Alberto Varela, nun encontro no que trasladou unha mensaxe de tranquilidade aos alcaldes e alcaldesas da costa ante a modificación do Regulamento Xeral de Costas. Na reunión participaron tamén o vicepresidente primeiro da FEGAMP, Ángel Moldes; o vicepresidente segundo, Secundino García Casal; e a vicepresidenta executiva, María Barral.
Durante a reunión, o delegado explicou que a reforma impulsada polo Ministerio para a Transición Ecolóxica e o Reto Demográfico responde “á necesidade de cumprir coa normativa europea e evitar sancións ao Estado, ao tempo que garante a seguridade xurídica das actividades económicas e a protección do litoral”, sinalou, aclarando que o anteproxecto “non vai impedir concesións nin reducir prazos”, senón que “adapta o procedemento para garantir a concorrencia competitiva, tal e como esixe a Comisión Europea”.
Ademais, dixo, “no caso do sector mar-industria a proposta non reduce os prazos das concesións vixentes, senón que prevé amplialos ata 75 anos para os cultivos mariños, fronte aos 50 anos establecidos na normativa de 2014”.
O delegado destacou que o proceso está aberto á participación das administracións e que o prazo de alegacións foi ampliado ata o 15 de abril como mostra da vontade de diálogo do Goberno.
Do mesmo xeito, subliñou que o Goberno está a actuar con “transparencia, diálogo e respecto ás competencias”, e insistiu en que “se analizarán todas as achegas que se presenten, incorporando aquelas que melloren o texto dentro do marco europeo”.
Pedro Blanco apelou á responsabilidade institucional e pediu evitar “alarmismos e incertezas innecesarias”, defendendo que a colaboración entre administracións é fundamental para ofrecer seguridade aos concellos e ao tecido produtivo.
“O que queremos é protexer o noso litoral e dar seguridade ás empresas”, sinalou o delegado, quen reiterou que os alcaldes e alcaldesas poden contar co Goberno de España como o seu mellor aliado. Finalmente, o delegado agradeceu ao presidente da FEGAMP a súa actitude construtiva e a súa disposición ao diálogo e ao entendemento.
