O PSOE de Ribeira esixiu ao Concello a adopción de medidas “urxentes e contundentes” en materia de seguridade tras o grave suceso rexistrado no porto de Ribeira, onde apareceu un cadáver esposado a unha escaleira, nun caso que os socialistas cualifican de “moi preocupante”.
Nun comunicado, o grupo municipal denuncia unha “escalada de delitos” nos últimos meses e considera que este episodio supón un punto de inflexión na situación de inseguridade que, segundo afirman, vive o municipio. “Estamos ante feitos máis propios de mafias que dunha cidade como Ribeira”, sinalan.
Desde o PSOE critican a actitude do goberno local e instan á alcaldesa a actuar con decisión para garantir a seguridade cidadá. “Xa lle demos tempo suficiente e non está facendo nada. Os veciños teñen dereito a vivir tranquilos”, apuntan.
Os socialistas sosteñen que este suceso non é illado e alertan dun aumento de delitos como roubos con violencia, danos en vehículos, agresións ou incidentes na vía pública, o que está a xerar unha crecente preocupación entre a veciñanza.
Entre as medidas propostas, reclaman o reforzo inmediato da Policía Local, tanto en medios materiais como humanos, así como unha maior formación para facer fronte a delitos cada vez máis complexos. Tamén solicitan á Xunta de Galicia que incremente a vixilancia no porto, un espazo que consideran especialmente vulnerable.
Neste sentido, denuncian a falta de control no recinto portuario, onde aseguran que as cámaras de videovixilancia levan anos sen funcionar e existe unha escasa presenza policial. Por iso, instan á alcaldesa a convocar con urxencia unha reunión con Portos de Galicia para esixir a reactivación inmediata destes sistemas de seguridade.
Ademais, o grupo socialista pide ao Goberno central que incremente os efectivos das forzas e corpos de seguridade do Estado na localidade, especialmente da Policía Nacional, co obxectivo de mellorar a capacidade de resposta ante o aumento da delincuencia.
“O que está a ocorrer é inaceptable. Ribeira non pode permitirse esta situación e precisa menos fotos e máis accións reais”, conclúen desde o PSOE local.
