O Consorcio de Santiago e a editorial Teófilo Edicións presentaron este xoves 9 de abril na Casa das Asociacións de Cornes a obra “Historia Industrial Vidán–Laraño”, un traballo que recupera e pon en valor parte da memoria industrial de Santiago de Compostela.
O libro, elaborado polo arquitecto Diego Campos-Juanatey e integrado na Biblioteca de Divulgación do Consorcio, ofrece un percorrido pola evolución dun dos enclaves produtivos máis relevantes da contorna compostelá, destacando a súa importancia histórica, social e arquitectónica.
No acto de presentación, o autor estivo acompañado pola alcaldesa e presidenta do Consorcio, Goretti Sanmartín Rei; o xerente da entidade, José Antonio Domínguez Varela; o director de Teófilo Edicións, José Luis Teófilo Piñeiro; e o responsable de publicacións do Consorcio, Juan Conde Roa.
A publicación toma como punto de partida o complexo industrial impulsado en 1792 polo comerciante compostelán Jacobo Pérez Villamarín, que incluía unha fábrica de curtidos de peles, unha fábrica de papel e varios muíños fariñeiros. A partir desta base, o estudo reconstrúe a evolución histórica do ámbito de Vidán–Laraño mediante unha análise rigorosa dos seus principais elementos arquitectónicos.
A obra combina unha visión global do conxunto cunha aproximación detallada aos distintos edificios, contribuíndo a destacar o valor da arquitectura industrial e a súa relevancia na configuración urbana e social da cidade.
Durante a presentación, Goretti Sanmartín Rei salientou a importancia desta publicación para ampliar a visión tradicional da historia compostelá, máis alá do seu coñecido patrimonio monumental. A rexedora subliñou a necesidade de “botar luz sobre barrios e parroquias que teñen moito que contar”, poñendo en valor o traballo de investigación que permite recuperar unha memoria en moitos casos esquecida.
Ademais, destacou que o libro permite comprender a evolución do ámbito de Vidán–Laraño desde finais do século XVIII ata a actualidade, reflectindo a transformación dun espazo que acolleu ao longo do tempo unha cooperativa residencial, unha industria punteira, un centro sociocultural, unha zona de lecer e mesmo un hotel singular.
