Galicia afronta esta xornada baixo a influencia dunha circulación de noroeste que arrastra unha masa de aire frío sobre a comunidade, provocando unha situación de inestabilidade atmosférica.
Ao longo do día agárdanse chuvascos, que serán máis probables e intensos na metade oeste do territorio, onde as precipitacións poderán ser máis persistentes en determinados momentos.
A cota de neve situarase arredor dos 1.100-1.200 metros, polo que non se descartan nevadas en zonas de montaña. No que respecta ás temperaturas, experimentarán un lixeiro descenso, mantendo valores baixos para a época do ano.
En canto ao vento, soprará do noroeste con intensidade moderada en xeral, contribuíndo a reforzar a sensación de frío durante a xornada.
O noso mar; vento do noroeste á mañá e á tarde e do sudoeste á noite, forza 2 a 3 á mañá e 2 a 4 á tarde e á noite. Mar ovellado á mañá e marusía á tarde e á noite. Visibilidade regular. Mar de fondo do noroeste, con ondas de 4 a 5 metros á mañá, 3.5 a 4.5 metros á tarde e 3 a 4 metros á noite.
