A obra de humanización da travesía de Palmeira, promovida pola Xunta de Galicia a través da Axencia Galega de Infraestruturas, será retomada nos vindeiros días logo de confirmarse a substitución da empresa encargada dos traballos.
Nos últimos días, a veciñanza da parroquia de Palmeira viña amosando a súa preocupación pola paralización das obras, motivada pola ausencia de persoal en varias xornadas. Segundo explicou a alcaldesa, María Sampedro, o Concello trasladou esta situación á administración autonómica, advertindo dos problemas detectados na execución do proxecto.
Tras manter reunións coa Axencia Galega de Infraestruturas e coa Consellería competente, confirmouse que a empresa adxudicataria non pode continuar cos traballos debido a problemas internos de carácter económico. Ante esta situación, acordouse buscar unha solución áxil que permita retomar canto antes unha actuación clave para a zona urbana da parroquia.
Finalmente, as autoridades confirmaron que a obra será asumida por unha nova empresa, estando xa en marcha os trámites administrativos necesarios para formalizar o cambio. O obxectivo é que o novo equipo poida incorporarse “na maior brevidade posible” e reactivar os traballos no terreo.
Desde o goberno local pediron desculpas á veciñanza polas molestias ocasionadas, subliñando que se trata dunha situación allea ás competencias municipais. Ao mesmo tempo, apelaron á paciencia dos residentes e aseguraron que se manterá unha vixilancia constante para garantir que a nova empresa cumpra cos prazos e coas condicións establecidas.
A alcaldesa destacou tamén a súa preocupación ante as queixas recibidas por parte dos veciños e agradeceu a “receptividade” da administración autonómica para buscar unha solución rápida que minimice o impacto dunha obra que afecta directamente ao día a día da cidadanía.
