A conselleira do Mar, Marta Villaverde, confirmou o apoio da Xunta de Galicia á quinta edición da feira Gastromar nun encontro mantido co presidente da Asociación de Empresarios de Ribeira, Francisco Martínez Gude.
A reunión tivo lugar en Santiago de Compostela este 10 de abril de 2026 e serviu para reafirmar o compromiso do Goberno galego coa promoción dos produtos do mar, que atopan neste tipo de eventos un escaparate privilexiado para destacar a súa calidade.
Durante o encontro, Villaverde salientou a importancia de iniciativas como Gastromar para reforzar a cadea mar-industria e fomentar o consumo de peixe e marisco. Neste sentido, subliñou que a feira tamén contribúe a visibilizar o talento culinario galego, achegando o mar á cidadanía e poñendo en valor o traballo dos profesionais do sector.
A conselleira destacou ademais o papel estratéxico deste evento como punto de encontro entre produtores, hostaleiros e consumidores, incidindo no seu impacto positivo na economía local. Non en balde, lembrou que o porto de baixura de Ribeira está considerado un dos máis importantes de Europa, o que reforza a relevancia dunha cita que continúa medrando edición tras edición.
