A Universidade de Santiago de Compostela celebrará este venres o acto de toma de posesión da súa nova reitora, Rosa M. Crujeiras Casais, nunha cerimonia solemne que terá lugar no Salón Nobre do Colexio de Fonseca.
O evento, previsto para as 11.30 horas, estará presidido polo presidente da Xunta de Galicia, Alfonso Rueda, e contará coa presenza de numerosas autoridades civís e académicas. Entre elas, asistirán tamén os reitores das universidades galegas: Manuel Reigosa Roger e Ricardo Cao Abad e as alcaldesas de Ribeira e Santiago.
A cerimonia comezará coa intervención de Alfonso Rueda, quen dará paso ao discurso do reitor saínte, Antonio López Díaz. Posteriormente, a secretaria xeral saínte da USC, Diana Santiago Iglesias, anunciará os cesamentos do actual equipo e o nomeamento oficial de Rosa Crujeiras.
Tras prometer o cargo e recibir a medalla e o bastón de mando da institución, a nova reitora pronunciará o seu discurso. A continuación, procederase ao nomeamento da nova secretaria xeral, Alicia Villalba Sánchez, así como do resto do equipo de goberno.
O acto será pechado polo presidente da Xunta e poderá seguirse en directo a través da canle de YouTube da USC.
