Co gallo de festexar o Día Internacional da Danza na Pobra do Caramiñal terá lugar o vindeiro domingo, 19 de abril, un evento aberto ao público que se levará a cabo ás 18 horas na praza Alcalde
Segundo Durán. No caso de que as condicións meteorolóxicas non sexan favorábeis, a actividade trasladarase ao colexio Salustiano Rey Eiras (Banda Seca).
Cómpre dicir que esta iniciativa, de carácter gratuíto, forma parte do programa Compromiso co Baile, impulsado polo Taller Alecrín co obxectivo de promover a participación cidadá e achegar a danza a todos os públicos.
O encontro presentarase como unha mostra de linedance e baile social en formato de clase aberta, na que participarán os alumnos e alumnas dos obradoiros do Taller Alecrín. Ao longo da tarde, o público poderá gozar de coreografías de diferentes estilos como Swing, Country, Bachata, Merengue, Cha-cha-chá, Soul, Disco e Funky.
Durante a presentación da actividade, o director do Taller Alecrín, Francisco Muñiz, avanzou que haberá “máis dunha sorpresa para enriquecer esta actividade” e explicou que “Compromiso co Baile é a nosa particular homenaxe ao Día Internacional da Danza, sumándonos ás celebracións que se realizan a nivel mundial”.
Para rematar, engadir que a concelleira de Cultura, Patricia Lojo, animou “a todos os veciños e veciñas a achegarse a participar nesta xornada e gozar dun medio de expresión tan fermoso como o é a danza”.
