A atleta María José Martínez Patiño será a homenaxeada neste 2026 na Carreira da Guía, impulsada pola Asociación de Veciños de Carreira, en colaboración do Concello de Ribeira. Esta deportista será entrevistada no xoves, 30 de abril, ás 20.00 horas, no Centro Social de Carreira, coa finalidade de que o público poida coñecer máis sobre a súa traxectoria vital e profesional. No que respecta á carreira, a cita presentarase en vindeiras datas.
María José Martínez Patiño (Vigo, 1961) é unha destacada atleta galega, especialista en probas de valos, cuxa traxectoria profesional estivo marcada por unha histórica loita polos dereitos das mulleres no deporte. A día de hoxe é doutora pola Universidade de Vigo e unha recoñecida investigadora. Forma parte do panel de expertos da Comisión Médica e Científica do Comité Olímpico Internacional (COI), onde traballa na regulación dos controis de sexo e a inclusión no deporte.
