A parroquia de Olveira celebrará esta fin de semana a tradicional Festa das Dores na capela de Sirves, unha cita relixiosa e popular que reúne cada ano a numerosos fieis e veciños da contorna.
A romaría, dedicada o domingo 12, á Virxe das Dores, constitúe unha das celebracións máis significativas destas datas, coincidindo coa oitava de Pascua e co Domingo da Misericordia. Trátase dunha festa de carácter familiar na que se conxugan a devoción relixiosa e a convivencia veciñal, mantendo viva unha fonda tradición na comunidade.
Os actos centrais desenvolveranse coa misa solemne prevista para as 13.00 horas, na que se renderá homenaxe á Virxe das Dores, figura que simboliza o amor e o sufrimento, iluminado pola esperanza da Resurrección.
Desde a organización, a cargo da Unidade Pastoral de Ribeira, destacan o valor espiritual e cultural desta celebración, que honra a fe e reforza os lazos entre a veciñanza, ao tempo que pon en valor o patrimonio relixioso da zona de Sirves.
A Festa das Dores consolídase así como unha cita destacada no calendario litúrxico local, mantendo o seu carácter tradicional e a súa capacidade de convocatoria ano tras ano.
Sábado 11 de Abril, comeza a festa en honra á Virxe das Dores no lugar de Sirves, na parroquia de Olveira do municipio de Ribeira, ás 23.00 horas cunha gran verbena amenizada por Jb Son e a discoteca móbil Planet con Dj Machito.
Domingo 12, ás 10.00 horas haberá dianas e alboradas co grupo Tahúme. A continuación oficiarase a misa solemne e ás 13.30 horas comezará a sesión vermú amenizada por Os Bugis.
Haberá inchables.
