A Biblioteca Municipal de Ribeira lanzou a quinta edición do concurso escolar de deseño de marcapáxinas, dirixido a promover a creatividade artística e plástica entre o alumnado de primaria dos centros educativos do municipio a través da elaboración dunha ilustración relacionada coa dinamización lectora.
“Este certame sirve como antesala á celebración do Día Internacional do Libro que se conmemora no 23 de abril. Mediante esta proposta queremos involucrar á comunidade educativa para, a través dunha actividade artística, contribuír a inculcar o hábito lector entre a rapazada. E, ao igual que sucede coa lectura, no deseño destes marcapáxinas incentivarase a súa creatividade; unha inventiva que marcará as páxinas nos libros dos lectores de Ribeira”, en palabras da concelleira de Educación, Nucha Brión.
A edil aproveitou a ocasión para lembrar de que esta instalación municipal acolle periodicamente mostras de libros que seguen unha temática concreta, estando actualmente dedicada á banda deseñada e, en vindeiras datas, haberá outras novas sobre poesía e teatro.
Pola súa parte, o bibliotecario Xoán Fernández precisou que este concurso busca tamén outorgar “gran protagonismo” á rapazada, pois, actualmente, o 35% das persoas usuarias da biblioteca ribeirense son menores de 14 anos.
O premio consistirá nun lote de libros e nun diploma, se ben tamén se imprimirá ese deseño en formato de marcapáxinas para repartir dende a Biblioteca Municipal. Ademais, elaborarase unha exposición con tódolos debuxos participantes.
Participación no concurso
Poderán participar tódolos nenos e nenas de Primaria dos colexios de Ribeira, con debuxos orixinais e inéditos relacionados coa lectura, o libro ou a biblioteca. Se levan texto, deberá estar escrito correctamente en galego.
Os deseños deberán ir asinados cun pseudónimo e ser entregados na Biblioteca Municipal ou no Servizo de Normalización Lingüística, ambos situados no Centro Cultural Lustres Rivas. Acompañarase un sobre pechado dentro do cal deberá figurar o nome de cada participante xunto co correspondente pseudónimo utilizado e curso (pode acompañarse dunha soa plica onde se recollan os datos de todo o alumnado dunha clase en forma de táboa). O xurado estará composto por persoal municipal dos departamentos de Cultura e de Educación e a súa decisión será inapelábel.
O prazo de admisión de obras estará aberto ata o vindeiro 15 de abril.
