O fotógrafo noiés Toño Villar foi distinguido como un dos integrantes da Colección de Honra da Federación Española de Profesionais da Fotografía e Imaxe (FEPFI), celebrados os pasados días 20, 21 e 22 de febreiro na Coruña.
No devandito certame, no que se avalían grandes e senlleiras obras do panorama nacional, 2 das contribucións de Toño Villar foron galardoadas con Mérito, acabando finalmente a súa inclusión na Colección de Honra, máximo galardón alcanzábel no devandito certame.
Estes fitos pechan para Toño Vilar un ano de grandes éxitos, xa que o devandito súmase á medalla de bronce obtida nos Tokyo Internatioal Photo Awards, ademais dunha Mención de Honra do xurado, así como a distinción conseguida nos Premios Nacionais Sony AFPV da Comunidade Valenciana, xunto a múltiples nomeamentos nos Premios Nacionais Quijote, nos Premios da propia FEPFI, e nos Premios Goya de Fotografía.
Parabéns do Concello de Noia
Tendo en conta todos estes éxitos, o Concello quixo felicitar Antonio Villar (Toño Villar Fotografía, con sede en Ames) polos “recentes recoñecementos acadados”, tanto pola súa distinción na Colección de Honra no Certame de Cualificacións da FEPFI como polo premio Sony FPV conseguido na Comunidade Valenciana.
“Trátase duns logros de enorme prestixio que recoñecen a excelencia técnica e artística do seu traballo, e que nos enchen de orgullo como vila. O talento, a sensibilidade e a dedicación de Antonio son exemplo do extraordinario nivel da fotografía local en Noia”, informou o Concello.
