A Comunidade de Madrid inaugurou este venres a exposición Valle-Inclán en Madrid, unha mostra que percorre a pegada que a capital deixou na vida e obra de Ramón María del Valle-Inclán, unha das figuras clave da literatura española do século XX e máximo expoñente do esperpento.
A exposición poderá visitarse do 20 de marzo ao 21 de xuño na Biblioteca Rexional de Madrid e enmárcase dentro dun programa cultural que inclúe un ciclo de conferencias para profundar na figura do autor galego. No acto inaugural participaron Xaquín del Valle-Inclán, neto do escritor e Antonio González Millán, director do Museo Valle-Inclán da Pobra do Caramiñal.
A primeira destas citas terá lugar o martes 31 de marzo ás 18:30 horas e estará a cargo de Joaquín del Valle-Inclán Alsina, neto do autor e comisario da mostra. Investigador e escritor, dedicou boa parte da súa traxectoria ao estudo da obra de Valle-Inclán, con publicacións como Valle-Inclán inédito ou a biografía Ramón del Valle-Inclán, xenial, antigo e moderno.
A exposición propón un percorrido polas etapas nas que Valle-Inclán residiu en Madrid —entre 1891 e 1935 en distintos periodos—, mostrando non só a súa evolución literaria, senón tamén a súa intensa vida cultural e social. A capital aparece así como un elemento fundamental na súa obra, ata o punto de converterse nun personaxe máis dentro do seu universo creativo.
O visitante poderá descubrir facetas menos coñecidas do autor, como o seu labor como editor e deseñador, así como a influencia das súas viaxes por América ou as súas relacións persoais a ambos os dous lados do Atlántico. Tampouco faltan referencias aos soados faladoiros literarios do Madrid da época, nos que participou xunto a outros escritores da Xeración do 98 como Miguel de Unamuno, Pío Baroja ou Azorín.
A mostra reúne unha ampla variedade de materiais —cartas, manuscritos, primeiras edicións, fotografías e obxectos persoais— procedentes de institucións como a Biblioteca Nacional de España, a Hemeroteca Municipal de Madrid ou o Museo de Valle-Inclán, ademais de fondos propios e da colección familiar.
En paralelo, o Foro Galicia e Valle Inclán, presidido por Joaquín del Valle-Inclán Alsina, continúa desenvolvendo labores de investigación e divulgación sobre a vida e obra do escritor máis internacional de Galicia.
