A asociación ambiental e activista Noia Limpa proseguiu esta fin de semana cos seus traballos de denuncia de agresións á natureza e de limpeza e retirada activa de residuos en paraxes naturais do rural e urbanas.
En concreto, as integrantes do colectivo levaron a cabo traballos de retirada de lixos no entorno da Cova da Moura e de Sobreviñas, en colaboración co Concello. Como vén sendo costume, foron apañados materiais de construción e agrícolas, rodas de vehículos e envases de alimentos (moreas de latas de refrescos e cervexas).
A estes labores de activismo ambiental súmanse os levados a cabo na praia de Río Sieira (no concello de Porto do Son), onde se retiraron principalmente aparellos de pesca e envases de alimentos; e máis en Testal, no propio concello de Noia, onde foron apañados 108 quilogramos de lixo.
O Concello felicitou ás e aos integrantes de Noia Limpa e lembrou que “nun contexto no que o incivismo e a falta de respecto polo noso entorno deixan pegadas en forma de lixo , é máis necesario ca nunca poñer en valor a quen dedica o seu tempo, esforzo e compromiso a coidar o que é de todas e todos. No Día Internacional das ONGs, queremos dar as grazas a todas as persoas que, de maneira desinteresada, traballan cada día por unha comunidade mellor”.
