As comarcas das Rías Baixas e a área de Santiago de Compostela vivirán este martes 3, unha xornada de tempo variable, marcada pola influencia dunha borrasca situada no Golfo de Cádiz e o anticiclón das Azores, que deixarán un corredor de vento do nordés sobre Galicia.
Nas Rías Baixas agárdase un ceo parcialmente nubrado, con alternancia de nubes e claros, especialmente nas horas centrais do día. No caso de Santiago, a mañá poderá comezar con máis nubosidade, pero co avance da xornada abriranse claros, deixando un ambiente máis luminoso pola tarde.
En canto ás temperaturas, as mínimas manteranse sen cambios, mentres que as máximas experimentarán un ascenso entre moderado e notable no sur, algo que se deixará sentir especialmente nas Rías Baixas, onde o ambiente será máis agradable durante a tarde. En Santiago tamén se notará esa recuperación térmica, cunha sensación máis primaveral nas horas centrais.(8 gras de mínima e 22 de máxima)
O vento soprará moderado do nordés, con maior intensidade no tramo costeiro entre Cabo Touriñán e Cabo Fisterra, aínda que nas Rías Baixas será en xeral frouxo a moderado.
O noso mar: Vento do nordés á mañá, do noroeste á tarde e do norte á noite, forza 3 a 4 á mañá e á tarde e 2 a 3 á noite. Marusía á mañá e á tarde e mar ovellado á noite. Visibilidade boa. Mar de fondo do noroeste, con ondas de 3 a 4 metros á mañá e 2 a 3 metros á tarde e á noite.
