A votación electrónica efectuarase entre as 9.00 e as 18.00 horas Santiago, martes 10 de marzo de 2026.- A USC elixe este mércores 11 a primeira reitora na súa historia, que dirixirá a institución os vindeiros seis anos. A votación nesta segunda volta será entre as catedráticas de Estatística e Investigación Operativa Rosa Crujeiras e de Óptica Maite Flores e deberá efectuarse de maneira electrónica (https://aplicacions.usc.es/axe/publica, accedendo con credenciais) entre as 9.00 e as 18.00 horas.
Durante a xornada electoral, ofreceranse avances de participación ás 12.00 horas e ás 16.00 horas a través do web habilitado a efectos de transparencia. Os resultados finais da votación poderán consultarse nesta ligazón, unha vez finalizado o escrutinio. A comunicación de incidencias durante o proceso de votación poderá realizarse enviando unha mensaxe a evoto@usc.es.
Nestas eleccións poden exercer o seu dereito ao voto un total de 28.326 persoas, das que 24.158 son estudantes, 1.573 Persoal Técnico de Xestión e Administración de Servizos, 1.354 Persoal Docente e Investigador con vinculación permanente e 1.241 do PDI restante.
Prazos
O día 12 de marzo producirase a proclamación provisional da reitora electa e do 13 ao 20 establécese o prazo para presentar recursos ante a Comisión Electoral Central. A proclamación definitiva terá lugar o 23 de marzo.
