A Deputación da Coruña, en colaboración co centro CITIC da UDC (Centro de Investigación en Tecnoloxías da Información e a Comunicación da Universidade da Coruña), impulsa esta tempada un programa educativo pioneiro sobre intelixencia artificial xenerativa dirixido ao alumnado de 4º da ESO e 1º de Bacharelato en 20 centros educativos da provincia. A iniciativa ten como obxectivo “achegar coñecementos básicos e competencias clave sobre unha das tecnoloxías máis transformadoras da actualidade, combinando contidos teóricos cun enfoque práctico”.
As sesións desenvólvense en aulas con computadores para o alumnado e permitirán aos estudantes comprender o funcionamento da IA xenerativa, coñecer aplicacións actuais como ChatGPT, Gemini ou HuggingChat, e reflexionar sobre o seu uso ético, seguro e responsábe.
O programa tamén porá o foco no potencial da IA na creación de contidos dixitais (imaxe, audio e vídeo) e analizará os retos e oportunidades que estas ferramentas presentan nos ámbitos educativo, social e profesional.
Esta semana os obradoiros recalan no IES As Insuas de Muros. Os días vindeiros chegarán a Boiro, en marzo, e a Ribeira, en abril.
Un programa baseado no marco europeo AILit
A proposta formativa do CITIC inspírase nas recomendacións do marco europeo AILit, estruturado arredor de tres eixes fundamentais: coñecementos, habilidades e actitudes para un uso eficaz e responsábel da IA xerativa. O programa aborda catro dominios clave: entender, usar, xestionar e deseñar IA.
O obxectivo principal é “proporcionar ao alumnado unha base sólida que lles permita comprender que é a IA xerativa, como funciona e en que se diferencia doutros sistemas de intelixencia artificial, así como coñecer conceptos técnicos básicos como os algoritmos, o adestramento con datos e a xeración probabilística de contidos”. O CITIC pretende tamén favorecer que estas ferramentas poidan usarse de forma práctica, segura e crítica, tanto no ámbito académico como na súa vida cotiá, “aprendendo a detectar nesgos ou erros nos resultados xerados por sistemas automáticos e reflexionando sobre as implicacións éticas, legais, sociais e ambientais do seu uso”.
Os contidos estrutúranse en dúas sesións de dúas horas en cada centro.
Na primeira sesión, xa celebrada no IES Agra do Orzán, abordouse unha introdución á intelixencia artificial, explicando que é e que non é, os seus principais eidos e os fundamentos da aprendizaxe automática e dos modelos de linguaxe. Traballouse tamén o uso de chatbots para a creación de texto, como ChatGPT, Gemini, Perplexity ou HuggingChat, xunto coa enxeñaría de prompts, a importancia da privacidade, o uso do contexto e os modelos que “razoan”. Ademais, analizouse a IA como ferramenta de apoio á aprendizaxe, atendendo á detección de nesgos, erros e plaxios, así como ao seu impacto nos procesos de estudo, especialmente na evocación, elaboración e transferencia do coñecemento.
Na segunda sesión do IES Agra do Orzán, que se desenvolveu este luns 23, o foco sitúase na IA xerativa aplicada á creación de imaxe, audio e vídeo, así como no uso seguro, consciente e legal destas tecnoloxías. Abordáronse técnicas de prompting para imaxe e a análise dos dereitos de autor, realizouse unha comparativa de ferramentas como Adobe Firefly ou Suno para a creación musical, e explorouse a xeración de audio e vídeo mediante distintas aplicacións. Presentáronse tamén ferramentas específicas como NotebookLM ou ChatPDF e promoveuse un debate arredor da autoría, a privacidade e o marco regulador europeo, incluída a futura Lei de IA.
Compromiso coa igualdade de oportunidades dixitais
O programa, que chegará a un máximo de 20 centros seleccionados pola Deputación da Coruña, desenvolverase ao longo do curso 2025-2026 en institutos urbanos e rurais da provincia.
Desde o CITIC subliñan que esta acción forma parte do seu compromiso coa transferencia de coñecemento á sociedade e coa promoción das vocacións tecnolóxicas entre a mocidade.
Este programa supón un paso máis na colaboración entre o CITIC e a Deputación da Coruña para achegar o coñecemento tecnolóxico á comunidade educativa e preparar ás novas xeracións para un contexto dixital en constante transformación.
O programa estrutúrase en dúas sesións formativas por centro, cunha duración de dúas horas cada unha. As sesións desenvolveranse nos seguintes centros:
Febreiro: IES Agra do Orzán (A Coruña): 9 e 23 febreiro; IES Ferrol Vello (Ferrol): 11 e 25 febreiro; IES Ortigueira (Ortigueira): 20 e 27 febreiro; IES Isidro Parga Pondal (Carballo): 23 e 26 febreiro; IES As Insuas (Muros): 23 e 27 febreiro; IES Concepción Arenal (Ferrol): 24 febreiro e 3 marzo; e IES Fene (Fene): 24 febreiro e 3 marzo
Marzo: IES Elviña (A Coruña): 3 e 4 marzo; IES Praia Barraña (Boiro): 4 e 13 marzo; IES Terra de Soneira (Vimianzo): 27 febreiro e 6 marzo; IES Sar (Santiago de Compostela): 5 e 19 marzo; IES Blanco Amor (Culleredo): 18 e 25 marzo; IES Eduardo Pondal (Ponteceso): 23 e 25 marzo; e IES Mariñas (Betanzos): 24 e 27 marzo
Abril: IES nº 1 Ribeira (Ribeira): 7 e 10 abril; IES Manuel Murguía (Arteixo): 7 e 14 abril; IES Xulián Magariños (Negreira): 15 e 17 abril; IES María Casares (Oleiros): 15 e 17 abril; e IES Cabo Ortegal (Cariño): 20 e 27 abril.
