O PSdeG-PSOE de Ribeira formulou no pleno municipal diversas propostas de mellora ao Plan Único de Concellos (POS) e mostrou o seu apoio á ratificación do obradoiro de emprego TAHUME XI, ao considerar que ambas iniciativas poden contribuír a mellorar os servizos, a formación e o emprego no municipio.
O portavoz socialista, Francisco Suárez-Puerta, advertiu dun descenso do investimento nalgunhas parroquias, como Aguiño e Oleiros, e reclamou unha distribución máis equilibrada dos fondos. Ao mesmo tempo, o grupo socialista achegou propostas concretas para distintas actuacións, entre elas a incorporación de beirarrúas, melloras en accesibilidade e seguridade, humanización de espazos públicos e ampliación dalgunhas intervencións previstas.
Suárez-Puerta tamén solicitou a retirada das luces de Nadal aínda pendentes nalgunhas parroquias e cuestionou a localización dalgúns investimentos, como o previsto en Olveira, ao considerar que deberían ser asumidos por outras administracións.
A pesar das críticas, o PSdeG apoiou as obras incluídas no POS ao tratarse de actuacións en beneficio da veciñanza. Así mesmo, o grupo socialista votou a favor do convenio do obradoiro TAHUME XI, destacando a importancia de impulsar iniciativas de formación e creación de emprego como ferramenta clave para mellorar o mercado laboral en Ribeira.
