O fotógrafo noiés Victor Manuel Martinez Campos (Pichero) acadou (a semana pasada) un novo e importante recoñecemento á súa traxectoria. Trátase do bronce acadado nos Sony Awards Ciutat de Valencia.
Dende o Concello de Noia emitiron un comunicado no que lle trasladan a súa “máis sincera noraboa”. E engaden: “En Noia sentimos este logro como propio, porque cada paso que dá Víctor Manuel lévanos tamén un pouco máis lonxe. O seu traballo, a constancia e a maneira única de mirar e contar a realidade son exemplo do talento que nace na nosa vila e que segue medrando e cruzando fronteiras”.
A imaxe galardoada é unha instantánea realizada para unha empresa de mexillón radicada na Pobra do Caramiñal. Lembrar que en 2018 o fotógrafo noiés tamén obtivo no mesmo certame un importante recoñecemento por unha fotografía na categoría de bebés.
Recordar tamén que Pichero estivo nomeado este anos en dúas categorías dos “Premios Goya da Fotografía” que concede a Asociación de Fotógrafos e Videógrafos Profesionais de Aragón (AFPA). Aspirou aos galardóns en dúas categorías por unha instantánea da campaña marisqueira de Noia (categoría de gráfico) e por un autorretrato (categoría de autorretrato).
