O 23 de febreiro de 1837 nacía Rosalía de Castro en Santiago de Compostela e para conmemorar o 189 aniversario dese nacemento celebrouse un ano máis o día da autora galega máis “consciente e comprometida”. No marco desta efeméride, a alcaldesa de Santiago, Goretti Sanmartín asistiu aos actos organizados pola Fundación Rosalía de Castro na praza de Vigo e no Panteón de Galegas e Galegos Ilustres. Tamén este luns 23 (Día de Rosalía) foi publicado un bando municipal a cargo da rexedora no que reivindica a actualidade de Rosalía e a vixencia da súa mensaxe combativa. O programa de actividades incluíu tamén o Festival Rosalía que se desenvolveu durante toda a fin de semana na praza de Mazarelos e noutros espazos da cidade.
Na praza de Vigo
A praza de Vigo, lugar onde naceu Rosalía, acolleu na mañá deste luns un acto público que deu comezo coa interpretación da Alborada de Rosalía por parte dos Carapaus e que contou coa participación de nenas e nenos dos colexios Quiroga Palacios e Cluny e a tradicional ofrenda floral. No acto participou a alcaldesa de Santiago, Goretti Sanmartín, xunto co conselleiro de Cultura, José López; a deputada de Lingua da Deputación da Coruña, Sol Agra; o alcalde de Padrón, Anxo Arca; o presidente da Asociación de Veciños Raigame, Xosé Manuel Durán; e o presidente da Fundación Rosalía de Castro, Anxo Angueira. Asistiron tamén membros da Corporación Municipal.
Na súa intervención, a alcaldesa enxalzou a rebeldía e o inconformismo de Rosalía, a quen definiu como muller alegre, culta, valente, brava e combativa, afastada do tópico de choromiqueira. “Foi unha muller que se adiantou en moitas das súas ideas e propostas á propia Virxinia Wolf, dicindo que ela quería vivir do que escribía, un paso fundamental para o resto de escritoras que viñan detrás”, valorou Sanmartín.
“Santiago de Compostela é unha cidade literaria”, celebrou a rexedora, e ligou este feito fundamentalmente á figura de Rosalía e á súa “mensaxe transgresora, de liberdade, de solidariedade e de xustiza social, absolutamente imprescindíbel”. Comprometeuse así a seguir estendendo dende o Concello de Santiago a súa figura e a súa obra.
No marco desta xornada, a Goretti Sanmartín tamén participou no acto organizado no Panteón de Galegas e Galegos Ilustres pola Fundación Rosalía de Castro no que se leron poemas da autora e que contou coa actuación musical de Uxía e Javier Ruibal. O acto pechouse como comezaba a mañá, ao son da Alborada de Rosalía dos Carapaus, e cunha degustación do Caldo de Gloria do cociñeiro compostelán Iago Pazos.
Bando polo Día de Rosalía
Ademais, a rexedora publica neste 23 de febreiro un bando con motivo da celebración do 189 aniversario da escritora, un manifesto que subliña a idea da súa actualidade e da vixencia da súa mensaxe.
A partir da pregunta de que muller sería hoxe Rosalía e que causas estaría defendendo, reivindícase a muller que “fai rexurdir a esperanza; consciente e comprometida, que se implica e participa; esa muller que escolle a lingua que tece e sostén a comunidade, que muller que ergue a voz contra a inxustiza… todas elas cunha mensaxe combativa”, explicou a alcaldesa, engadindo que “mentres a avaricia sen límite continúa devorando o planeta, mentres os intereses duns poucos priman por riba de pobos enteiros, mentres as mentiras e a desinformación toldan as xanelas polas que miramos, temos sinalados no calendario fitos cos que espertar a conciencia. Un deles é, cada 23 de febreiro, o Día de Rosalía”.
Outros actos
Durante esta fin de semana, a capital galega xa celebrou a Rosalía coa oitava edición do Festival que acolleu sábado e domingo a praza de Mazarelos, un certame que a alcaldesa de Santiago, Goretti Sanmartín, inaugurou o sábado.
Sanmartín Rei inaugurou o evento definindo a Rosalía como o “referente” que marcou o inicio do Rexurdimento e que “conseguiu facer o camiño para as que viñeron detrás”. Segundo destacou, “sen ela seriamos diferentes”, reivindicando a Santiago como o lugar onde a poeta se fixo escritora .
Pola súa parte, o concelleiro de Urbanismo e Vivenda, Iago Lestegás, participou no acto central organizado pola Asociación de Escritoras e Escritores en Lingua Galega (AELG) este domingo no Panteón de Galegas e Galegos Ilustres para homenaxear a Rosalía de Castro.
Baixo o lema #maiselestaménperdidos , a escritora Eva Veiga deu lectura ao manifesto deste ano tras o saúdo do presidente da entidade, Cesáreo Sánchez Iglesias e das interpretacións musicais da Asociación Cultural e Musical Solfa. Lestegás, pola súa parte, participou na lectura de poemas e escolleu, para a ocasión Pra a Habana!
