As XXI Xornadas de Cultura Mariñeira “Muros Mira ao Mar” celebraranse os días 10, 11 e 12 de xullo de 2026. A comisión das XXI Xornadas de Cultura Mariñeira “Muros Mira ao Mar”, reunida o 5 de febreiro, acordou por unanimidade que as datas de celebración da edición de 2026 serán os días 10, 11 e 12 de xullo. Este acordo supón o primeiro paso para iniciar os traballos de organización e planificación dun dos eventos culturais máis destacados do calendario muradán, permitindo avanzar na coordinación coas entidades e asociacións.
A edición anterior, celebrada en xullo, foi un gran éxito de público e participación: un evento xa consolidado no calendario cultural e turístico da comarca que rendeu homenaxe á tradición mariñeira do municipio. O programa incluíu tres días de mercado, concursos, obradoiros, visitas guiadas, música, maxia, xogos populares, izada de velas, conxuro de queimada, demostracións grastronómicas e exposicións… actividades todas elas vinculadas co mar.
A alcaldesa de Muros, María Lago, destacou o orgullo que supón para o municipio acoller esta celebración: “A esencia destas xornadas é o noso orgullo como vila mariñeira, dando a coñecer a nosa cultura e poñendo en valor o mar, que é o noso ben máis prezado”.
