Ribeira é unha das 17 cidades Innpulso que renova a súa distinción de Cidade da Ciencia e a Innovación por apostar por políticas locais innovadoras nos seus territorios. No caso ribeirense, o galardón atópase na categoría de municipios de 20.001 a 100.000 habitantes; un recoñecemento obtido no 2015 e que se mantivo ao longo destes anos dado que “é unha urbe que busca de forma sistemática e deliberada facer cousas novas ou facer as mesmas cousas de maneira diferente, propóndose retos significativos e desafíos que aporten valor á cidadanía e á sociedade no seu conxunto e dándolles resposta a través de proxectos de innovación e desenvolvemento urbano”, destaca a alcaldesa, María Sampedro.
Nos últimos anos procedeuse coa instalación de cargadores móbiles na vía pública, implantación dos sistema de cartelería dixital, pasos peonís intelixentes, mobilidade sostíbel, a rehabilitación da Casa Consistorial, a posta en marcha da Aula CeMIT ou os bonos AmaRibeira, entre outras moitas intervencións, segundo salientou a rexedora, engadindo que “son medidas en materia de infraestruturas e servizos sempre coa mirada posta nunha Ribeira máis intelixente, sustentábel, turística e humana”.
Engadiu que Ribeira Atlántica 2015 “marcou a folla de ruta para definir o futuro da cidade, dándolle continuidade co Máis Ribeira Atlántica apostando pola Estratexia de Desenvolvemento Urbano Sostíbel e Integrado (EDUSI), ambos financiados con fondos FEDER”. Ademais, apuntou, “o novo paradigma que trouxo consigo os ODS impulsaron a Axenda Urbana de Ribeira Atlántica no ano 2022, para nos anos posteriores, financiar actuacións definidas no Plan de Acción Local da Axenda Urbana a través de Fondos Next Generation e continuar avanzando agora mediante a Estratexia de Desenvolvemento Integrado Local Ribeira Atlántica 2030”.
Outros programas nos que se atopa inmersa a Administración local ribeirense son o Plan de Sustentabilidade Turística en Destino (PSTD), o Programa de Impulso á Rehabilitación dos Edificios Públicos (PIREP) e o Programa de Transición Enerxética.
A distinción permite a Ribeira formar parte da Rede Innpulso, xunto con outras 100 cidades de España, ademais de beneficiarse do exclusivo financiamento que permite dispor dun Axente Local de Innovación.
