O Concello de Noia confirmou que este 29 de xaneiro, grazas á coordinación coa ONCE, foi retirado o quiosco de xogo que estaba diante do IES Virxe do Mar. “Este paso forma parte do noso compromiso por protexer ao alumnado e garantir contornas saudábeis arredor dos centros educativos”, informou o Concello, engadindo que “co cumprimento das normas que establecen distancias entre estabelecementos de xogo e centros de ensino para reducir a exposición de menores aos xogos de azar, reforzamos a seguridade e o benestar da nosa mocidade”.
Dende o Concello tamén salienta que coa retirada do quiosco avánzase na protección urbana da fachada e do valor histórico dun edificio emblemático de Noia como o IES Virxe do Mar.
