O Auditorio Municipal de Padrón acolleu esta mañá o acto de apertura do Programa Integrado de Emprego (PIE) 2025-2026, que supón o inicio dunha nova etapa profesional para cen persoas desempregadas dos concellos de Padrón, Dodro, Rois, Pontecesures, Catoira e Valga. O programa desenvolverase ao longo de nove meses e ofrecerá unha formación intensiva orientada a cubrir as vacantes técnicas que demandan as empresas do tecido produtivo da comarca.
O proxecto conta cun investimento próximo aos 300.000 euros, cofinanciados pola Xunta de Galicia e o Servizo Público de Emprego Estatal (SEPE), e consolídase como unha ferramenta clave para a dinamización económica local e a mellora da empregabilidade.
Durante o acto, o alcalde de Dodro, Xavier Castro, puxo en valor a traxectoria dun programa que cumpre nove edicións, destacando a súa orientación práctica e adaptada ás necesidades reais das empresas. “Ofrecemos unha formación directa, rápida e axustada ao que demandan as empresas da comarca. Esta é unha ocasión única para formarvos e atopar un traballo”, sinalou dirixíndose ás persoas participantes.
Pola súa banda, o alcalde de Padrón, Anxo Arca, subliñou a importancia da formación de proximidade como ferramenta para fixar poboación e talento no territorio. Arca animou o alumnado a “aproveitar unha oportunidade única de formarse naqueles campos que precisan as empresas da comarca, o que vos pode axudar a traballar preto das vosas casas”. O rexedor padronés amosouse optimista cos resultados do programa, confiando en que nesta edición se volva superar o obxectivo mínimo do 37 % de inserción laboral e se achegue ou supere o 50 % ao remate do ciclo.
Ao acto de inauguración asistiron tamén a alcaldesa de Pontecesures, Maite Tocino, e os alcaldes de Catoira, Xoán Xosé Castaño, e de Rois, Ramón Tojo. Non puido estar presente o alcalde de Valga.
O obxectivo do Programa Integrado de Emprego 2025-2026 é mellorar a empregabilidade e favorecer a inserción laboral das persoas participantes mediante accións personalizadas que combinan orientación, formación e prácticas en empresas. O itinerario inclúe entrevistas individuais, asesoramento laboral, talleres de habilidades sociais, intelixencia emocional, mobilidade laboral e preparación para procesos de selección.
A formación centrarase en sectores con alta demanda de persoal, como as industrias alimentarias, fabricación mecánica, téxtil e confección, administración e xestión, comercio e loxística, hostalería e turismo, servizos á comunidade, ámbito sociosanitario ou imaxe e son.
Ademais, as persoas participantes poderán realizar prácticas non laborais en empresas da contorna e contarán cunha bolsa diaria de 10 euros para facilitar a asistencia ás actividades formativas.
