Do 20 de xaneiro ao 9 de marzo o alumnado de 3ºESO e 4ºESO do IES Nº1 de Ribeira participará no Programa de Educación Emocional Espertando a Forza Interna. Será impartido pola psicóloga sanitaria Mª Carmen González Hermo, experta en psicoloxía de emerxencias, psicóloga deportiva, e membro da rede de formadores-colaboradores do CAFI. A experta, no transcurso do obradoiro, creará un espazo onde o alumnado poida expoñer as súas inquedanzas e reflexionar sobre elas en base a principios de calidade de vida, cooperación, autocoidado e coidado mutuo e saúde mental.
O seu principal obxectivo é que o alumnado sexa capaz de identificar e adquirir novas ferramentas de afrontamento propias, reflexionar sobre os valores e sobre o propio proxecto vital, fortalecer o sentido de pertenza ao grupo e, tamén, adquirir estratexias para previr e dar apoio ante unha crise de ansiedade.
E para conseguilo, empregará unha metodoloxía “moi participativa”, segundo adiantan dende ANPA Caramecheiro (organizadora do programa), engadindo que a Carmen González “fará investigacións sobre as súas emocións, debates, presentacións tipo publicidade-marketing, entrega de preguntas e inquedanzas anónimas, pósters a partir de imaxes de revistas, un debuxo en papel continuo dunha aldea celta cos distintos roles e crearán un poema coas frases que resuma o que aprenderon”.
Na última sesión avaliarán o programa cunha enquisa cun código QR.
Con estes obradoiros, a ANPA Caramecheiro do IES Nº1 de Ribeira agarda “achegar recursos que axuden a diminuír as taxas de ansiedade, violencia, bullying ou suicidio entre a nosa mocidade”.
Esta actividade está organizada pola ANPA Caramecheiro en colaboración co IES Nº1 de Ribeira e subvencionada pola Deputación da Coruña.
