Radiotelevisión Española non ten remedio. Cando non é por unha cousa, será pola outra; máis nunca chove a gusto de todos.
Cando se acordou maioritariamente apoiar a creación do Consello de Informativos fomos moitos os que demos un paso avante para que o devandito Consello fose unha realidade tanxible que nos fixera esquecer as aínda recentes discusións en relación cos pasos a dar para facer que o Consello acabado de consensuar fose algo máis que un bo desexo.
Xa en marcha este, xurdiron as primeiras críticas ao seu labor e as liortas xeradas polo intento de acadar, senón un acordo unánime, si a o menos a posta en común da idea do funcionamento dun órgano non dependente da dirección e con capacidade de determinación á hora de establecer regras que permitisen que un medio de comunicación público se desvinculara dos intereses políticos e/ou económicos imperantes na España constitucional, recente aínda a ditadura franquista.
De aquel primeiro Consello de Informativos gardo memoria das duras críticas á perda de audiencia tanto na Radio (coa forte competencia establecida polas emisoras privadas) coma na TV. (perdida xa a condición de ser TVE a única cadea existente en todo o país). A culpa foi para o intento de externalizar programas e informativos, sen ter en conta a existencia dunha competencia ata entón inexistente.
Case medio século máis tarde e cado programas e informativos de TVE e RNE recuperan boa parte da audiencia perdida grazas a programas como La Revuelta, Mañaneros 360, Malas lenguas, o musical Aria, os novos aires dos telexornais e 24 horas, rexorden as vellas críticas: a externalización da produción cando en realidade é grazas a esa externalización que RTVE recuperou boa parte dunha audiencia que se consideraba perdida.
A Radio e a Televisión públicas non son o ensino ou a sanidade: poden -e deben- competir en calidade. Só esta permite e admite a competencia que, unha outra vez, critica con dureza o Consello de Informativos de TVE que bota man novamente do incumprimento das “normas fundamentais para a elaboración de información en RTVE” no que semella ser un novo intento de marcha atrás que beneficiaría exclusivamente a unha competencia moi interesada en recuperar unha audiencia que lles proporciona píngües beneficios.
