Casa RIA, a sede da Fundación RIA en Santiago, compartiu detalles da que será a primeira exposición monográfica dedicada ao traballo de deseño desenvolvido por David Chipperfield Design ao longo dos últimos 35 anos. A mostra transformará o edificio nun espazo de reflexión sobre o deseño como acto de coidado, enraizado no material, no territorio e na vida cotiá.
A exposición inaugúrase o xoves 5 de febreiro e, durante 4 meses, as dúas primeiras plantas de Casa RIA acollerán unha selección de máis de 50 obxectos, xunto con prototipos, referencias e bosquexos que reflicten de maneira integral o proceso de deseño, tendo como base os recursos materiais ofrecidos polo territorio.
A mostra complétase cunha programación continuada de actividades que se desenvolverán nos vindeiros meses.
A inauguración da mostra dará comezo ás 18:30 h coa primeira actividade enmarcada dentro do programa público: Deseño para vivir, unha conversa arredor do deseño de obxectos e da traxectoria do estudio de deseño do arquitecto inglés afincado en Corrubedo (Ribeira), David Chipperfield, que participará xunto con Dirk Gschwind e Paolo Dell’Elce, director xerente e director de deseño de David Chipperfield Design respectivamente. Este evento é de carácter privado e baixo invitación.
Ás 19:30h a mostra estará aberta ao público ata completar aforo. Durante o acto realizarase unha breve presentación na que intervirán David Chipperfield, presidente da Fundación RIA, Celeste Chipperfield, directora de Casa RIA e Manuel Rodríguez, director da Fundación RIA. Ao remate, os asistentes poderán visitar a exposición acompañados dun cóctel a cargo do equipo da Cantina.
Esa mesma mañá, de 12:00 a 13:00 h, celebrarase unha presentación da mostra dirixida a autoridades e a outras entidades clave para a xestión do territorio, con acceso libre para a prensa.
