A Garda Civil de Boiro desarticulou dous puntos de venda de substancias estupefacientes na localidade, no marco da operación Zaguanes, e detivo a catro homes e unha muller como presuntos autores dun delito contra a saúde pública, outro de branqueo de capitais e un terceiro de pertenza a grupo criminal.
A investigación, que estivo tutelada polo Xulgado de Instrución Número 2 de Ribeira, iniciouse no verán de 2025 tras detectarse un aumento de roubos en establecementos e furtos en vehículos. Durante as pescudas, os axentes pescudaron que a muller detida compraba as drogas nunha vivenda de Boiro e distribuíaas posteriormente desde o seu propio domicilio, o que xeraba un constante trasfego de toxicómanos na zona.
Coa correspondente autorización xudicial, a Garda Civil rexistrou ambos os inmobles e achou 226,64 gramos de heroína, 1.137 gramos de cocaína, 144,56 gramos de hachix, 43,16 gramos de marihuana, 3,97 gramos de MDMA e 3,12 gramos de éxtase, ademais de 6.300 euros en efectivo, útiles para a manipulación e distribución das substancias e outros efectos relacionados coa actividade delituosa.
Os cinco detidos foron postos a disposición do Xulgado de Instrución nº 2 de Ribeira, que decretou o ingreso en prisión do suposto xefe do grupo. Aos moradores das vivendas rexistradas tamén se lles imputou un delito de receptación, ao tempo que se procedeu á incautación de todos os obxectos intervidos.
