Mellorar a seguridade viaria en estradas de titularidade da entidade provincial é o obxectivo da xuntanza que levaron a cabo o alcalde de Boiro, José Ramón Romero; o concelleiro de Urbanismo e Obras, Luis Ruiz; a deputada de Vías e Obras, Mónica Rodríguez e os técnicos da Deputación da Coruña. No encontro avaliáronse os puntos máis conflitivos e consideráronse as principais necesidades nunha visita aos puntos sobre os que se pretende actuar. “Agradecemos e visita da deputada e o persoal técnico para traballar de maneira conxunta nas principais necesidades en materia de seguridade das vías provinciais ao seu paso polo noso termo municipal”, afirmou o alcalde.
Máis en concreto, consideráronse actuacións en puntos do termo municipal de Boiro de tres estradas provinciais: na DP-1105 que une Boiro e Noia, na DP-1106 que vai a Abanqueiro e na DP-1103 que une Boiro e Lousame.
