Que está a pasar cos migrantes nalgúns países europeos? Xa ninguén os quere para continuar explotándoos laboral e socialmente? Xa non lembramos o que fixemos nalgúns países, denominados subdesenvolvidos economicamente, que colonizamos e usurpamos as súas riquezas naturais coa colaboración dos seus corruptos gobernantes? Xa non nos lembramos cando os nosos pais e avós tiñan que saír do país en busca dunha vida mellor.
Os migrantes, ante todo son persoas e como tales merecen a protección necesaria por ser unha cuestión de Dereitos Humanos. Europa ten que ser un exemplo de Liberdade, Democracia, Humanidade e acatar os Dereitos Humanos dentro das súas propias fronteiras. Moito dos problemas que xorden cos inmigrantes son ocasionados pola usura, a prepotencia e o enriquecemento de moito países occidentais e das súas empresas.
O que sucedeu nestes días nun municipio de Catalunya, Badalona, foi vergoñento, xenófobo, racista e inhumano. Non pode ser que, por cuestións políticas, sexan desaloxadas varios centos de persoas inmigrantes e vulnerables dunhas instalacións sen garantirlles unha alternativa habitacional. O Concello así como a Comunidade Autónoma teñen a obriga legal de reacollelos nunhas condicións mínimas de salubridade e decencia humana.
Algunhas formacións políticas e grupos sociais ou veciñais están a criminalizar aos inmigrantes, co beneplácito ou o silencio cómplice de demasiadas institucións públicas e iso é un perigo para a convivencia. Hai que regular a migración pero tamén hai que respectar as persoas, con independencia da súa cor de pel ou do volume da súa conta bancaria.
