Unha fronte atlántica atravesará Galicia entre a noite do venres e a primeira metade do sábado 6, San Nicolás de Bari, deixando unha xornada marcada polos ceos moi nubrados e chuvias abundantes, especialmente na provincia de Pontevedra e no suroeste da Coruña, onde se prevén os acumulados máis persistentes e intensos.
Co avance do día, as precipitacións irán perdendo continuidade, converténdose en intermitentes durante a tarde, aínda que o ambiente húmido e inestable continuará presente en boa parte da comunidade.
As temperaturas mínimas vivirán un ascenso moderado, mentres que as máximas se manterán sen cambios significativos. Os ventos, de compoñente suroeste, soprarán moderados en xeral pero fortes no litoral noroeste, onde se poderían rexistrar refachos de consideración.
As condicións mellorarán de cara ao final do día, aínda que a inestabilidade podería prolongarse durante a noite en puntos do litoral oeste.
O domingo 7, quedaremos nunha situación intermedia entre altas e baixas presións xerando circulación do suroeste intensa. Agárdase unha xonrnada de ceos nubrados, con máis nubes ao oeste onde teremos chuvias en xeral febles e persistentes, indo a menos co avance da tarde. As temperaturas non terán cambios significativos. O vento soprará do suroeste con intervalos fortes en terra, forte no mar.
O noso mar: Vento do sudoeste á mañá e á tarde e do sudoeste á noite, forza 3 a 4 á mañá, 4 a 5 á tarde e 4 a 6 á noite. Marusía á mañá e forte marusía á tarde e á noite. Visibilidade mala á mañá e á tarde e regular á noite. Mar de fondo do noroeste, con ondas de 5 a 6 metros á mañá, 4 a 5 metros á tarde e 3.5 a 4.5 metros á noite.
