Este sábado 27 de decembro haberá un espectáculo familiar no Teatro Coliseo Noela, en Noia. A compañía Redrum Teatro trae Os contos de Lobicán, unha obra chea de tenrura, humor e fantasía pensada para os máis pequenos da casa. Será este sábado ás 18.30 horas, con entrada de balde.
Público recomendado: de 3 a 8 anos.
Duración: 45 min.
Os contos do Lobicán é un espectáculo de monicreques musical, en verso, áxil e atrevido, destinado a nenos e nenas de entre 3 e 8 anos, que busca darlle a volta aos contos clásicos ao tempo que transmite unha mensaxe educativa e valores universais como a amizade, a cooperación, o respecto pola natureza, o pensamento crítico e a importancia da imaxinación.
O texto de Eva Mejuto foi gañador do XV Premio Barriga Verde 2022 e gañador do Premio ao Mellor Espectáculo de monicreques nos XXIX Premios de Teatro María Casares. O espectáculo está inspirado no atractivo mundo de Wes Anderson onde as cores, a escenografía, o vestiario e a música axudan a trnasmitir os valores anteriormente mencionados. A través da riqueza da narrativa e dos seus entrañábeis personaxes, a función convida a nenos e nenas a reflexionar sobre o mundo que os rodea e imaxinar novas posibilidades dun futuro máis inclusivo.
