O PPdeG difundiu este sábado o seu tradicional vídeo de felicitación do Nadal, protagonizado polo presidente do partido e da Xunta, Alfonso Rueda, quen nesta ocasión se pon á fronte dos fogóns para preparar a cea de Noiteboa. A peza combina humor, mensaxes políticas e referencias á actualidade estatal, coa participación de destacados dirixentes populares como Alberto Núñez Feijóo, Mariano Rajoy e Miguel Tellado.
No vídeo, Rueda decide cociñar coa intención simbólica de reunir a todos os galegos arredor da mesma mesa, unha decisión que sorprende tanto aos seus compañeiros de partido como ás súas propias fillas, que volven aparecer na felicitación institucional do PPdeG.
O líder nacional do Partido Popular, Alberto Núñez Feijóo, móstrase convencido do éxito da iniciativa e ironiza afirmando que “mellor a cociña de Rueda que a cociña do CIS”, mentres que o presidente de honra do PPdeG e expresidente do Goberno, Mariano Rajoy, ofrécese como axudante de cociña. Pola súa banda, o secretario xeral do PP, Miguel Tellado, anuncia a súa intención de viaxar a Galicia para “tranquilizar o clima” ante a expectación xerada pola noticia.
Ao longo do vídeo non faltan as alusións á actualidade política estatal, con referencias ao PSOE, ao caso Koldo, a Pedro Sánchez ou ás enquisas do CIS, así como situacións caricaturizadas como un Peugeot mal aparcado, a aparición dun Ábalos disposto a sumarse á cea ou un apagamento eléctrico, en clara referencia ao ocorrido no pasado mes de abril.
A mención ao BNG aparece cando, ao servir a cea, Rueda pregunta se hai algún intolerante entre os comensais, ao que unha das participantes responde con retranca: “Eu a todo, en xeral”.
No seu cometido culinario, o presidente do PPdeG conta coa colaboración de distintos cargos do partido, que achegan produtos tradicionais como a bica ourensá, nunha referencia tamén á provincia afectada polos incendios forestais.
O vídeo péchase cun brinde de Alfonso Rueda no que combina ton persoal e mensaxe política: “Poida que non sexa o mellor cociñeiro do mundo, pero trato o noso con respecto, agarimo e intentando facer as cousas ben, por todos os galegos e galegas”, concluíndo que esa é unha maneira de facer que en Galicia “sabemos facer moi ben”.
