O O Concello de Noia vén de reforzar a Unidade de Prevención da Drogodependencia (UPAD) coa incorporación dunha nova psicóloga, dando resposta a unha demanda histórica e culminando o proceso de contratación iniciado nos últimos anos.
O Concello informou tamén que está previsto que sexa aprobada en pleno, de maneira definitiva, a transferencia da UPAD ao Servizo Galego de Saúde (SERGAS), tal e como xa acontece con outras unidades de drogodependencia existentes no resto de Galicia.
A concelleira de Servizos Sociais, Sandra González, destacou a importancia deste paso: “Era unha reivindicación constante que o SERGAS asumise esta competencia sanitaria, polo que celebramos que a Xunta de Galicia dea resposta a esta necesidade e garanta a continuidade do servizo no noso municipio”.
González explicou tamén que o proceso administrativo prolongouse debido ás peculiaridades técnicas e organizativas da UPAD de Noia, pero confía en que unha vez formalizada a transferencia, se poidan abordar estes aspectos nunha comisión específica: “Agardamos que se poñan sobre a mesa solucións en materia técnica e de recursos humanos, asegurando que os profesionais se incorporen coas mesmas condicións laborais que teñen na actualidade”.
Coa chegada da nova psicóloga e a integración da unidade no sistema sanitario público galego, o Concello de Noia reafirma o seu “compromiso coa prevención e o tratamento das adiccións e coa mellora dos servizos que se prestan á cidadanía”.
