O Concello de Boiro vén de recibir un premio no IX Concurso de Boas Prácticas Municipais na prevención e intervención fronte ao absentismo e na mellora da convivencia escolar polo Proxecto EnClave. A concelleira, María Outeiral, recolleu na mañá deste 10 de decembro o premio en Madrid, na sede da FEMP.
Este concurso está convocado pola Federación Española de Municipios e Provincias e o Ministerio de Educación, Formación Profesional e Deportes e, en particular, o proxecto foi presentado na categoría de Mellora da Convivencia Escolar en Municipios de ata 20.000 habitantes.
“Somos o único concello galego que recibe un premio neste concurso e facémolo polo Proxecto EnClave que trata a saúde mental, o benestar emocional e a resolución de conflitos nos centros educativos”, recoñeceu a María Outeiral.
O Proxecto EnClave do Concello de Boiro é un programa pioneiro e innovador que naceu no curso 2021/2022 para “educar, previr o acoso escolar e promover o benestar emocional e a saúde mental do estudantado da localidade”.
Trátase dun programa vivo que se vai adaptando cada curso escolar en función das necesidades detectadas polo persoal docente e a comunidade educativa. “Este premio é un recoñecemento a un proxecto que engloba a toda a comunidade educativa e que foi creado a consecuencia das necesidades detectadas despois da pandemia”, afirmou a concelleira, María Outeiral, engadindo que “o obxectivo xeral que persegue este programa é promover unha cultura de convivencia positiva, inclusiva e corresponsábel na contorna escolar mediante unha estratexia transversal e innovadora que integra os ámbitos educativo, social e da igualdade co fin de previr a violencia, fomentar a equidade e fortalecer os vínculos comunitarios”.
O proxecto, integral e preventivo, combina atención psicolóxica, promoción da saúde, detección temperá de dificultades da aprendizaxe e mellora da convivencia. A atención psicolóxica atallase a través de programas estruturados de atención psicolóxica individualizada e acompañamento emocional no contexto escolar; a promoción da saúde reforzando a prevención de hábitos saudábeis e autocoidados como a hixiene bucodental, a saúde visual e a educación afectivo-sexual; e detección temperá de dificultades de aprendizaxe como a dislexia e TDAH.
O proxecto desenvolvese durante todo o curso escolar, coordinado polas áreas de Educación e Igualdade do Concello de Boiro, e está financiado integramente polo Concello de Boiro.
