Unha condutora resultou ferida este mediodía despois de que o vehículo no que viaxaba se saíse da vía e impactase contra a medianeira da AG-11, ao seu paso por Palmeira, no punto quilométrico 38. No coche tamén viaxaba unha nena de curta idade, que se atopaba liberada e accesible no momento da chegada dos servizos de emerxencia.
O 112 Galicia recibiu o aviso dun particular que alertaba do sinistro e, poucos minutos despois, a propia condutora contactou co servizo de emerxencias para solicitar asistencia sanitaria tanto para ela como para a menor.
Ata o lugar desprazouse un operativo integrado por Urxencias Sanitarias de Galicia-061, os Bombeiros e o GAEM de Ribeira, a Garda Civil de Tráfico e os servizos de mantemento da estrada.
Os Bombeiros tiveron que intervir para facilitar a evacuación da ferida, cortando o respaldo dun dos asentos do vehículo para poder retirala con seguridade.
