O Concello de Padrón vén de iniciar as obras de construción de dous novos espazos de lecer infantil, un situado no campo da Devesa, en Estramundi, e outro na rúa Vila de Rianxo. Con estes proxectos, serán xa cinco as áreas de xogo renovadas durante o goberno de Anxo Arca. As actuacións supoñen un investimento total de 99.893 euros, financiado a través do Plan de Obras e Servizos (POS) da Deputación da Coruña.
O alcalde destaca o compromiso do executivo local coa mellora dos espazos públicos destinados á infancia e ás familias. “Trátase de dous parques que se atopaban nun estado de mantemento deficiente, logo de anos sen intervencións, e que precisaban dunha renovación integral”, sinala.
Estes novos espazos súmanse aos do paseo da Constitución, ao do colexio Flavia e ao situado ao carón do centro de saúde da vila. En pouco máis de dous anos, o Executivo de Anxo Arca renovou así cinco áreas infantís. “Este investimento permite que Padrón conte con espazos de calidade para a infancia, o que reflicte o esforzo e interese do Concello pola veciñanza máis nova e polas súas familias”, engadiu o rexedor.
Visibilización das mulleres galegas na ciencia
Ademais da mellora das instalacións, o Concello continúa avanzando na visibilización das mulleres galegas na ciencia. Por iso, os novos parques levarán o nome de dúas figuras destacadas da investigación e da medicina galega.
No seu momento, o Concello xa nomeara o parque infantil situado ao carón do centro de saúde co nome de Antonia Ferrín, matemática e primeira astrónoma galega. Agora, o novo parque da rúa Vila de Rianxo levará o nome de Inmaculada Paz-Andrade, científica, física e investigadora de proxección internacional. Foi a primeira catedrática da Facultade de Física da Universidade de Santiago de Compostela e referente mundial en microcalorimetría, abrindo camiño para moitas outras profesionais.
No caso do parque infantil do campo da Devesa, en Estramundi, levará o nome de Olimpia Valencia, recoñecida como a primeira médica galega, especializada en xinecoloxía, e pioneira no exercicio libre da medicina nun tempo no que o acceso das mulleres á universidade era moi limitado.
Con esta iniciativa, o Concello de Padrón quere continuar “combinando a creación de espazos públicos de calidade coa posta en valor das referentes femininas galegas, integrando educación, igualdade e memoria social na mellora dos equipamentos municipais”, sinalaron fontes do Consistorio.
