O Concello de Noia formalizou finalmente a reapertura do Coliseo Noela, en palabras do Goberno local “unha das infraestruturas culturais máis emblemáticas do municipio”. Fíxoo tras varios meses de traballos de mellora e reparación integral.
Fontes do Concello explicaron que “debido ao seu avanzado estado de deterioro e ás deficiencias detectadas en materia de seguridade, o inmóbel viña estando pechado dende o 12 de agosto de 2025”. Agora, e tras unha intervención impulsada polo Goberno local —realizada en parte co apoio da Xunta de Galicia—, o Coliseo “recobra todo o seu esplendor e volve estar dispoñíbel para o uso público en condicións óptimas”, sinalaron dende o Executivo.
Durante este tempo realizáronse actuacións fundamentais para garantir a seguridade, funcionalidade e conservación do espazo, entre as que destacan:
Impermeabilización da parte traseira do edificio, afectada por filtracións.
Reparación de máis de 40 deficiencias no sistema eléctrico.
Eliminación de fungos (mofo) e mellora da ventilación.
Substitución de tubaxes de auga danadas nos vestiarios superiores.
Tratamento contra térmites e outras pragas.
Instalación de bombas de achique no patio interior.
Actualización do sistema eléctrico dos vestiarios.
Reparación e homologación do cortalumes.
Arranxo do controlador de luces e mellora da iluminación.
Adaptación ao plan de prevención de riscos laborais.
Limpeza e acondicionamento do exterior do edificio.
“Con esta intervención, o Coliseo Noela recupera o seu papel como punto de encontro cultural e social da veciñanza, preparado para acoller de novo espectáculos, eventos e actividades en condicións seguras, cómodas e modernas”, explicou o Concello.
