A dotación de garda do GAEM de Ribeira (Grupo de Emerxencias e Protección Civil Municipal), a petición do CIAE 112, interveu este mércores 26 de novembro pola tarde, sobre as 16.00 horas, na asistencia nun accidente de tráfico na estrada DP-7306 (á altura da Graña, na parroquia de Carreira, concello de Ribeira). O dispositivo tamén contou coa presenza da Policía Local de Ribeira e a Garda Civil de tráfico. O vehículo implicado foi un Alfa Romeo, cuxo condutor resultou ileso malia a aparatosidade do accidente.
O sinistro veu motivado por unha saída de vía pola marxe dereita en dirección Carreira. O coche esnafrouse finalmente contra un muro de pedra que foi derribado e que, segundo informaron os veciños, xa fora obxecto de danos previamente noutros incidentes de tráfico.
A instancias da chamada dun particular ao 112 Galicia, acudiron axentes da Policía Local e da Garda Civil e a dotación de garda do GAEM, que traballou na limpeza de aceite e combustíbel derramado na estrada e máis na beira polo vehículo sinistrado.
