A Xunta de Galicia resolveu o concurso de ideas convocado o pasado mes de setembro co fin de obter un prototipo de chiringuito biosostíbel integrado na paisaxe das praias e das contornas naturais costeiras galegas. En total, 3 das 16 propostas finalmente admitidas e avaliadas foron seleccionadas para ser incluídas na proposta final.
O xurado, presidido polo director do Instituto de Estudos do Territorio (IET), Enrique de Salvador, e outros técnicos do organismo ademais de dous arquitectos, reuniuse este luns 24 de novembro por quinta e última vez para analizar os traballos e decidiu asignar un primeiro premio de 12.000 euros para a proposta baixo o lema Do mar ao furancho, un segundo de 10.000 euros para Módulo, serie e litoral e un terceiro de 8.000 euros para Secadoiro.
Tendo en conta que a convocatoria do concurso está dirixida á selección das mellores ideas das que sacar un prototipo que posteriormente se poida replicar e materializar nun proxecto construtivo, durante o proceso de selección valorouse sobre todo “a viabilidade e calidade arquitectónica das propostas, os valores funcionais e paisaxísticos así como a sostibilidade ambiental, económica e social dos deseños presentados”. De feito, o gañador do premio de 12.000 euros está previsto que, nunha fase posterior, poida optar tamén á redacción do proxecto básico e de execución do prototipo.
Con esta iniciativa, licitada a principios de setembro, a Consellería de Medio Ambiente e Cambio Climático busca “unificar a estética dos establecementos hostaleiros de tempada —coñecidos como chiringuitos— co obxectivo de garantir un desenvolvemento respectuoso co medio natural da costa galega e integrar este tipo de instalacións coa contorna”. A medida, ademais, encaixa na tripla perspectiva (ambiental, económica e social) coa que se elaborou a Lei de ordenación e xestión integrada do litoral de Galicia.
