A OPP83 – Cooperativa Santa Uxía de Ribeira vai organizar este xoves 27 de novembro un programa de actividades educativas sobre pesca e peixe, destinadas a favorecer o consumo deste produtos entre as novas xeracións e a visualizar e reivindicar as múltiples vantaxes de consumir peixes e mariscos.
A axenda desenvolverase en horario escolar, de 9:00h a 14:00h. As actividades de divulgación previstas van dirixidas ao alumnado do CEIP Heroínas de Sálvora, en Aguiño, co obxectivo de “achegar o mundo da pesca e dar a coñecer o peixe capturado pola flota da capital do Barbanza”. A xornada inclúe un obradoiro de cociña, no que os nenos e nenas aprenderán a elaborar Lirio de Ribeira, e unha charla educativa sobre as principais especies que chegan ao porto de Ribeira, o seu valor nutricional e a importancia dun consumo responsábel, fomentando que os participantes se convertan en compradores profesionais no futuro.
Contarase coa presenza de membros do Consello Reitor da OPP83 e da súa xerente, María José Casais. Estas actividades enmárcanse no PPeC 2025 da OPP83, cofinanciado pola Xunta de Galicia e o FEMPA.
