O colectivo medioambiental Noia Limpa instalará un cinceiro participativo no que contar cabichas, ao abeiro da campaña Cada Cabicha Conta. Realizarase na Lonxa do Testal, Noia, o vindeiro mércores 19 de novembro as 12.30 horas. Contarase coa colaboración da Aula Sostible do Freixo.
Cada Cabicha Conta
Trátase dunha acción que conta coa colaboración do colectivo Noia Limpa e co apoio da Confraría de Noia. A actividade preséntase o mércores 19 de novembro ás 12:30 na Lonxa de Noia en Testal, onde será instalada unha caixa para o depósito de cabichas, un dos residuos máis habituais e contaminantes e con gran impacto no mar.
Mediante a instalación de cinceiros de votación, preténdese reducir a contaminación por cabichas, fomentando a implicación das e dos profesionais do sector pesqueiro. “Os cinceiros funcionarán como espazos de votación sobre temas diversos para despertar o interese da xente”, explicaron dende Noia Limpa, engadindo que a campaña toma o relevo en Noia, despois da instalación do cinceiro no mes de outubro na zona portuaria de Muros dentro do proxecto Aula Ambiental dos Outeiriños.
A Aula Sostible do Freixo
A Aula é un espazo no que diferentes entidades do territorio da ría de Noia-Muros traballan na recuperación e valorización de residuos plásticos para o deseño de pezas e útiles de uso na actividade marisqueira e da pesca.
A Aula é un proxecto colaborativo do que forman parte a Asociación de Mulleres do Mar da Ría de Muros Noia, Misela asociación de inclusión social e o Concello de Outes. Conta co apoio do GALP Costa Sostible e está financiado polo Fondo Europeo Marítimo e de Pesca a través da Consellería do Mar da Xunta de Galicia.
A Aula do Freixo programa accións de posta en valor do patrimonio natural e costeiro a través da sensibilización, limpeza de zonas costeiras e recollida de lixo mariño para a súa posterior transformación seguindo as directrices da economía azul.
O proxecto pretende apoiar e coidar o mar e a súa costa e contribúe a por en valor os seus recursos, exercendo de modelo para outros axentes e actores.
Tamén traballa no desenvolvemento de accións de sensibilización e concienciación ambiental, como é a campaña de sensibilización Cada Cabicha Conta.
