Coincidindo coa celebración do Día Mundial da Parada Cardíaca, o 16 de outubro, UCIN Boiro solicitou ao Goberno local a posta en marcha de obradoiros formativos de reanimación cardiopulmonar (RCP) e primeiros auxilios, dirixidos a toda a cidadanía. Desde UCIN Boiro considérase que “a formación en RCP e primeiros auxilios é unha ferramenta esencial para salvar vidas, e que o Concello debe implicarse activamente na promoción dunha cultura de autoprotección e resposta ante emerxencias”.
Dende UCIN Boiro din que “en moitos outros concellos de Galicia xa se están a desenvolver iniciativas de formación en RCP e primeiros auxilios, organizadas en colaboración con Protección Civil, Cruz Vermella ou os servizos sanitarios autonómicos” e que “estas experiencias amosan que este tipo de obradoiros son perfectamente viábeis cos recursos municipais, requiren un investimento mínimo e xeran un grande impacto social e formativo, contribuíndo a que cada vez máis persoas estean preparadas para actuar ante unha emerxencia médica”.
UCIN Boiro propón que “o Concello organice xornadas e charlas-obradoiro abertas á poboación, en colaboración con Protección Civil, Cruz Vermella e o SERGAS, tanto en centros educativos como en asociacións veciñais e deportivas”. Ademais, indican que “estas charlas e obradoiros poderían celebrarse a pé de rúa, en espazos públicos como prazas, parques ou centros sociais, e estar abertos a toda a cidadanía”.
Deste xeito, sinalan, “todas as persoas poderán participar sen barreiras, aumentando a concienciación sobre a importancia de coñecer técnicas de RCP e primeiros auxilios e fomentando unha cultura de prevención e autoprotección”.
Estas accións, apuntan, “poderían desenvolverse do mesmo xeito que xa se levan a cabo programas como Muller e Saúde ou os cursos de defensa persoal, iniciativas moi positivas que demostran a capacidade organizativa do Concello”.
UCIN Boiro lembra que “estas iniciativas non deberían limitarse a un día ao ano, senón que a formación en RCP e primeiros auxilios debería ser permanente, cun programa municipal continuado que permita á veciñanza recibir esta formación de forma regular e acceder a obradoiros ao longo de todo o ano, garantindo así unha maior preparación ante emerxencias”.
Con esta proposta, UCIN Boiro quere sensibilizar ao Concello e á cidadanía sobre “a importancia de estar preparados ante unha emerxencia médica, aproveitando a data simbólica do Día Mundial da Parada Cardíaca para dar un paso firme cara a un Boiro máis seguro, solidario e comprometido coa vida”.
