O subdelegado do Goberno na Coruña, Julio Abalde, deu esta mañá a benvida aos 75 novos axentes da Garda Civil que se incorporan aos seus destinos na provincia. No acto estiveron tamén presentes o xeneral xefe da 15ª zona, Miguel Ángel González Arias, e o coronel xefe da Comandancia da Coruña, Fernando Pedreira Lata.
A demarcación da Garda Civil da provincia da Coruña abrangue o 94% do territorio provincial, o que supón o 57% da poboación, con 644.899
habitantes. Conta cunha comandancia e cinco compañías situadas na Coruña, Ferrol, Santiago, Noia e Carballo. Dos novos efectivos incorporados, 59 reforzarán a seguridade cidadá: 27 destinaranse á Compañía da Coruña, 10 á de Ferrol, 8 á de Santiago de Compostela, 6 á de Noia e 8 á de Carballo. O resto de efectivos reforzarán áreas de Informática, Desactivación de explosivos e Servizo Marítimo, entre outras.
Durante a súa intervención, o subdelegado destacou a relevancia do labor da Garda Civil “nunha provincia con casuísticas moi diversas que require unha presenza próxima e comprometida co territorio”. Abalde puxo especial énfase “no traballo exemplar que a Garda Civil realiza na loita contra a violencia de xénero, un ámbito no que debemos seguir avanzando até erradicar completamente esta lacra social”.
