A alcaldesa de Ribeira, María Sampedro, participou este mércores no acto de celebración do décimo quinto aniversario da apertura do centro de día de AGADEA (Asociación Galega para a Axuda dos Enfermos con Demencia tipo Alzhéimer) no municipio.
Durante a súa intervención, a rexedora felicitou á asociación polos seus quince anos de labor ao carón das persoas con dependencia e das súas familias. “Agardo que percorramos esta senda durante moitos anos máis, seguindo aportando vivencias, coñecemento e experiencias á traxectoria de Agadea e tamén á cidadanía de Ribeira”, afirmou.
Sampedro destacou ademais que “o traballo de AGADEA non se limita ao interior do centro, senón que sae á rúa e busca que os nosos maiores sigan formando parte activa da sociedade”. A alcaldesa tamén puxo en valor a colaboración entre administracións para seguir dotando de recursos en materia de dependencia, coa finalidade de mellorar a calidade de vida das persoas usuarias.
O acto contou tamén coa presenza do director xeral de Maiores e Atención Sociosanitaria, Antón Acevedo; da subdirectora xeral de Envellecemento Activo e Innovación Sociosanitaria, Eloína Núñez; do concelleiro de Servizos Sociais, Vicente Mariño; e da edil de Igualdade, Ana Barreiro.
A xornada estivo marcada por momentos de emoción, recordos e celebración, con actividades como unha tómbola na que se repartiron quince agasallos e a proxección dun vídeo que repasou en imaxes a historia do centro a través dos seus usuarios e traballadoras. O evento pechouse cunha actuación musical das Garridiñas de Castiñeiras, da Asociación Amas de Casa.
