A Asociación ÁGAPE poñerá en marcha este mes de outubro o programa Ocio con Alas, unha proposta de lecer dirixida a adolescentes do concello de Ribeira e da comarca do Barbanza que buscan un espazo seguro onde pasar o tempo libre, coñecer xente e participar en actividades adaptadas aos seus intereses.
Na presentación da iniciativa celebrada en Santa Uxía estiveron presentes, a concelleira de Educación, Cruz Rivadulla, a concelleira de Cultura, Antía Alberte, a presidenta de ÁGAPE, Ana Ruth Arnoso, a terapeuta ocupacional, Alba Rodiño e a integradora social, Nancy Silva.
O proxecto desenvolverase na Casa da Xuventude de Ribeira, en horario de tardes os venres, e conta co apoio da Concellería de Xuventude e Educación do Concello de Ribeira, que, ademais de facilitar o espazo apoia o seu financiamento xunto co Fondo Social da Confraría da Dorna e as entradas solidarias da obra de teatro Enraizadas. Gracias a todo isto poderase levar a cabo o programas ata o mes de xuño do próximo ano.
Ocio con Alas nace para ofrecer unha alternativa a mozos e mozas que, por diferentes razóns, non atopan con facilidade un grupo de amizades ou espazos nos que se sintan cómodos, creando así un punto de encontro seguro, respectuoso e participativo, onde expresarse e compartir tempo de maneira activa.
Estrutura do programa
O proxecto desenvolverase entre outubro de 2025 e xuño de 2026, dividido en tres fases que acompañan o proceso de crecemento e autonomía da mocidade.
As sesións estarán guiadas por Alba Rodiño, terapeuta ocupacional e técnica en inclusión social especializada en neurodiverxencias, e Nancy Silva, terapeuta en xestión emocional e técnica en inclusión (Apertas de Cores).
As fases do programa serán as seguintes:
1. Niño seguro (outubro-decembro): actividades de cohesión, creatividade e confianza, para coñecerse e sentirse parte dun grupo.
2. Ás curtas (xaneiro-marzo): encontros quincenais que alternan planificación e saídas na comunidade, fomentando iniciativa e participación.
3. Voar alto (abril-xuño): actividades abertas e dúas saídas longas fóra de Ribeira, elixidas polo propio grupo segundo os seus intereses.
Nesta fase final, o obxectivo é que, ao rematar o programa, conten con ferramentas e confianza para organizar de forma autónoma as súas propias saídas e encontros, segundo os seus intereses e coas persoas afíns do grupo.
Participación
O programa Ocio con Alas está aberto a todas as persoas preadolescentes e adolescentes que busquen un espazo diferente, sen presións nin etiquetas, especialmente a quen non conta cun grupo de iguais estábel ou non se sinte incluído nas propostas de ocio habituais. As familias tamén participarán en encontros de inicio, seguimento e peche, acompañando o proceso.
Metodoloxía
As sesións combinarán xogo, creatividade, convivencia e planificación, nun clima de respecto e seguridade. Aplicarase unha metodoloxía vivencial, flexíbel e progresiva, con apoios visuais, rutinas claras e espazos tranquilos cando sexa necesario, adaptándose ás necesidades individuais e grupais. O obxectivo é favorecer autonomía, participación social e expresión emocional, acompañando a cada participante desde o que é.
Inscricións
As inscricións poden realizarse a través do teléfono e canles habituais da Asociación ÁGAPE. Contacto : info.asociacion.agape@gmail.com. 602 44 21 55.
As prazas son limitadas e a participación require ser socio/a da entidade e realizar unha pequena achega mensual para cubrir materiais e actividades.
