A Xunta de Galicia e o Concello de Outes colaborarán nos vindeiros meses para reforzar o número de contedores destinados á recollida selectiva de residuos e mellorar os servizos municipais relacionados coa xestión da auga. Así o acordaron hoxe a conselleira de Medio Ambiente e Cambio Climático, Ángeles Vázquez, e o alcalde, Francisco Calo, nun encontro celebrado en Santiago.
En materia de residuos, a conselleira comprometeuse a solicitar a Ecoembes o subministro de novos contedores amarelos e azuis —para envases lixeiros, papel e cartón— co obxectivo de incrementar este mesmo ano a capacidade de recollida no municipio. Ademais, anunciou que a finais de 2025 a Xunta volverá convocar unha orde de axudas destinada á adquisición de contedores marróns para a materia orgánica, animando ao Concello de Outes a presentarse á convocatoria.
Melloras no saneamento e no abastecemento de auga
Durante a reunión tamén se abordaron as necesidades do municipio en materia de saneamento e abastecemento. O alcalde trasladou á conselleira as deficiencias detectadas nos pozos de bombeo de augas residuais e nas foxas sépticas que dan servizo a pequenos núcleos. Vázquez lembrou que Outes recibiu este ano unha achega da Xunta para realizar unha auditoría da súa rede de saneamento e animou ao Concello a empregar eses resultados para elaborar proxectos que poidan optar ás axudas anuais de Augas de Galicia.
Outro dos asuntos analizados foi o estado da Estación de Tratamento de Auga Potable (ETAP) de Roo e da súa condución, infraestruturas con máis de 25 anos de antigüidade. A responsable autonómica instou ao rexedor a solicitar as liñas de apoio previstas para o próximo ano co fin de mellorar a rede e reducir perdas de auga.
Apoio autonómico aos concellos
A Consellería de Medio Ambiente lembrou que, malia tratarse de competencias municipais, a Xunta leva anos colaborando con apoio técnico e financeiro. Só este ano, Augas de Galicia dispón dun orzamento de 144 millóns de euros para optimizar o saneamento e o abastecemento mediante melloras de infraestruturas, accións de formación e políticas activas contra o cambio climático.
